வேர்கள்

காலைத் தேநீர் சாயம் ஊறவே,

கண்ணீர்க்கடல் கடைந்திடும் எம்

மந்தார மலைகள், தார்-வாசுகிகள்

நெரித்திட மூச்சு வாங்கும் மலைகள்.

மலைமூடிய தேயிலைநிரை,

மலைவாழ் எம் பரம்பரை - எங்கோ

பிடுங்கப்பட்டு இங்கே நடப்பட்டோம் - எம்

வியர்வை குடிக்கும் வேர்கள்.

சீதைகள் கொழுந்து பறித்திடும்

அசோகவனங்களில் இங்கு 

அநுமன் வாலாய் லயன்கள், 

பெயரிடாத அகதி முகாம்களாய்.

பிறந்து வளர்ந்து உழைத்துமாளும் - எம்

சிதைகள் மேல் தேயிலை நிரைகள்

முளைக்கட்டும். கணுக்காலில் அட்டைகள், 

நடந்த வழி குருதிச்செம்மண் சிவக்கட்டும்.

தினமொரு கூடைக்கொழுந்து -

தேர்தல் திருநாளில் வாக்குப்பெட்டி...